يكتبها: الأمين الشابي
جاء سيدي رمضان وهلّ، والنّاس قبل بنهار ترصد في الهلال وتطل. وكالعادة انقسمت دولنا المسلمة ككلّ…هذا أعلن الصيام نهار الأربعاء والبقية يوم الخميس، وكلّ بلاد وقتاش هلالها يظهر ويطل..وما احلى الديمقراطية بين الأشقاء كيف تهلّ.
وكالعادة، طيلة شهر رمضان، المصلح عم سلومة يتحزم ويتحلف إلاّ ما يكشف ‘الخنار’ الكلّ. وإن شاء الله رمضان مبروك علينا الكلّ، اربعاء وخميس، وحاضر محمد وغايب ابليس.
من حومة لحومة
عم سلومة، كلّ يوم باش يتحفنا بحكاية، وهو يدور من سوق لسوق ومن حومة لحومة، وهو يهدر كالفحل. وكلّ ما تكلم في موضوع كلامه يقطر عسل. تلقاه من جهة لجهة من الإدارة لإدارة يحقق ويدقّق ويطلّ. مرّة يشكي من غلاء المعيشة وهي لغز وأسرار، واللّي متسبب فيها، حسب رأيه، هو ارتفاع الأسعار. ومرّة يتدخل باش يفض خصومة وهو يصيح اشنوا ها الخنّار. ومرّة يشري عركة إمّا مع الخضار وإلاّ الجزار وما سلمش منّو حتى العطّار.
في رمضان مستشار!
اشبيها لحمة الكرومة، ما عادش فيها لذّة ولا تذكار. واشبيه البرتقال لايث ياخي كان راقد في الفريقو وإلاّ في الفريجيدار. واشبيها الدقلة غالية، ونخلها صابة وبذّار. واشبيه الموز سومو اركب الصاروخ وما خلّى وراء كان الغبار.
الحصيلو ما تطوّل عليكم الهدرة، رحبونا بعمكم سلومة، راهو في رمضان يرقّوه ويصبح مستشار. وهو لابس جبّة بالقدر والتحكار، وبعكازو يصول ويجول ومعنقر كبوسو يا حُضّار. وكلّ يوم يطلع بطلعة ونوّض وراها الغبار.
