كتب: محمد الحمّار
أنت حُر بش ترمي البونتة متاع السيڨارو في الطريق وإلا على الرصيف، بش تطَيش دبوزة الماء الفارغة في تركينة من تراكن الشارع، بش تبصق عالمباشر، بش تتكَلم كلام زايد على مرأى ومسمع من المارة…
بش ترَبرب أمام الملأ، بش تعاكس فتاة متعدية مع صديقها وإلا خطيبها، بش تبزنس على مرا أو تغمزها في ظهر راجلها، بش تحتسي كعيبات بيرة في الكرهبة وتطَيش الشقف من الشباك فين جا جا، بش تفَرغ الطقطوقة (cendrier) متاع الكرهبة مليانة تستغيث وتستنجد بيك، بش تفَرغ أُمها في الكياس تقولش عليك مُزارع تغذي في أرض متاع فلاحة بالأسمدة..
لعبة متاع فلاشات!
بش تكُح وإلا تعطس في وجوه المارة…تقولش عليك بش تمركي بونتو راس راس مع الحارس، بش تبول على الحيط وإلا على جذع شجرة سَخفتّك على خاطرها زمنية وفي أوكد الحاجة للمزرجة (mise à jour)، بش تشير بصبعك لحانوت وإلا قهوة وقريب تطمز اللي متعدي بجنبك تقولش عليك مشارك في لعبة متاع فلاشات (flèches) في كرماس..
بش تفُك بلاصة شخص في الصف متاع الكوشة وإلا العطرية تقول الجدود متاع الحاضرين موش راضين عليهم وبعثوك أنت في مهمة سفير الرجولية والرجلة.
البِنة فاش؟
راك قادر بش تعمل هذا الكل، وأزيد منو، والبِنة فاش، في كَونو ما يكلمك ولا يدور بحالك حتى حد من المواطنين، ربما لأنهم هومة كيفك من المُطيشين أو من المُفَرغين أو من المعاكسين أو من الفلاحين متاع الطريق العام أو من المرَسكين في المحلات التجارية أو من المهندسين متاع تصريف المياه (البشرية)، لكن ربما زادة ما يكَلموكش وما يوَقفوكش عند حدك لأنهم، رغم اللي يعرفو ويحُقو اللي أنت مخالف للقوانين، إلا أنهم يخافو. موش يخافو من القانون اللي هومة يعرفوه ويحُقوه. يا يخافو منك أنت لا تطَيشهم أو تبعثهم أو تسقيهم، يا يخافو لا سيادتك تتهمهم بأنهم يحبوك تمتثل للقوانين.
إي نعم سيدي خويَ، اللاّ أختي. ثمة الخوف من القانون وثمة الخوف من اللي بش يتهمك بأن نفسك أمّارة بالسوء وبالتالي سَولتلك بش تحَرض على تطبيق القانون. الأولى موجودة فعلا في الكتب والجرائد والمجلدات والإذاعات والتلفزات، والثانية موجودة فينا، من داخل من داخل.
