كتب: محمد الحمّار
ساعات نحب نتناقش مع شخص في موضوع نطرحو العبدولله، بصيفتي واحد من متساكني بلاد متاع مسلمين في عام 2026، واذا بيه هالشخص كيف هاك القطار اللي ضَيع السكة وبالتالي عمل ديرَايمون..
ومن بعد تقول عليه امتطى مركبة فضائية وضغط على فلسة الـmarche-arrière وإلا ركب على متن هاك الكابسولة متاع الزمن ووَخر دُغري حيث القرن السابع م. وبدا، هاذي تنفع، هاذي تضُر، يُرجم فيّ رجم، يا بآية كريمة، يا بحديث، يا بـ “قال ابن كثير”، يا بـ”كما جاء في صحيح البخاري”، يا بـ”جاء في صحيح مسلم”…لين نقول فيها “ماينة” ونرمي المنديل، بش مانقولش فيها “ووه” وناخذ الطيارة الاولى اللي تهزني لبَر “الكفار” نكَمل معاهم بقية العمُر.
فاش قام نحَيرو في الموتى؟
يا معلم! راهم ابن كثير وابن ماجة والجلالين والبخاري ومسلم ماهمش عايشين في زمن الـiptv والذكاء الاصطناعي والهاتف الذكي. ربي يرحمهم. كلامهم على قلوبنا كي العسل. مقامهم على روسنا وعينينا. لكن راهي دماغاتنا ما تشتغلش كيف دماغاتهم وعينينا تشوف في حاجات ما شافوهاش هومة، بل ماجاش لبالهم اللي هي بش تتُوجِد واللي أحنا بش نشوفوها.
بالتالي راهو كل مؤمن بالله وبمحمد وبما جاء في محكم التنزيل وبالرسالة، راهو مقتنع بالدين الحنيف، وراهي التفاسير متاع السابقين تسكن في قلوبنا وفي عقولنا، لذا فاش قام نحَيرو في الموتى اللي صاغوها وساهمو بيها في بناء مجتمع متاع مسلمين ما يلَعبو حَد لا في المعرفة ولا في العلم ولا في الفلسفة ولا في الأدب، لكن مجتمع متاع الوقت هاذاكة.؟!
كوكب ما بعد التفسير
فاش قام نحَيرو في موتانا حتى لين يدعيو بينا بالشر؟! ياخي اللي عايشينو توة المسلمين موش دعاء شَر متاع هاك العلماء المفسرين على خاطر ننبشولهم في قبورهم وماناش قادرين بش نعملو كيفهم؟!
بش ننجمو نعملو كيفهم يلزم ناخذو القطار en marche موش نتسبّبولو في خروج عن السكة. يلزم نمتطيو المركبة الفضائية اللي تصعد بينا الفوق وماعندهاش آلية متاع marche-arrière، المركبة اللي تحَلق بينا نحو كوكب الحاضر، كوكب ما بعد التفسير post-exégèse .
