تحيّة: الأمين الشابي
تحيّة لمزلس البلدية ورجالها جملية
وصدقوني قد أنا ما نقول فيه شويّة
البلاد النّظافة والعفافة وبكلّها مقديّة
هاي شوارعنا نظيفة لا سو ولا سويّة
الحفر بكلها ردمها المزلس والبلدية
لا حفرة بحذا حفرة ولا طبعة في الثنية
الشجرات مزبورة واشكون يقول أحيّه
البالوعات تخدم على روحها بكل رجولية
تزيّن في البلاد خاصة في فصل الشتوية
الجردات نوار و ورد و عشاب مستويّة
بالأمارة عندنا الكلاب تبات في الفسقية
بلادنا ما احلاها وزادت بهواتها البلدية
ساهرة علينا وشكرنا ليها مش مزيّة
في الصيف البحر عجبة والميّة فضية
كان شوية قشور دلاع ملوحة في الرملية
شكيرات بلاستيك وكلاب تعوم مع البحرية
مزلسنا اللي فينا مكافينا وراضي هو وهي
مضمون في لحظة يحضر بفلسة من جنّية
رخصة البني بالمصري يا شماتة أبلا فيّا
الأكشاك كثرت وما احلى العيشة الزمنية
لبلابي مع فول مدمس و الدرع والمحلبيّة
في المرشي يسود النّظام والأسوام مقديّة
الخضارة نصب نصب وكل مرّة يقدم شويّة
الخردة والفريب تزين البلاد من الصبحية
المزلس ديما يخدم فينا بكل روح رياضية
يغمض عين ويفتح عين لبعض القهواجية
خليهم يستعمرو المادة ولاعندنا حتى مزية
الكرنيش الاسم العالي وزغرد يا للاّ بدرية
