كتب: صالح الحاجّة
أمي تراكي …يا زهرة فايزة الرائعة …ربي يرحمك …قداش توحشتك ..
وقداش توحشت قعدتك …وشكشوكتك البنينة ..وكاس تاي اخضر..
قداش توحشت الحصيرة والمخدة الكرينو وكعبات الكاكاوية المندية …
قداش وقداش …
وهاك التلفزة اللي قدامنا وتصويرتها بالابيض والاسود تشطح ..
وهاك القطوس عنتر يمشي ويجي كانو صيد..
ما احلاك يا أمي …ماكذبش اللي سماك ناس ملاح ..
انت امراة طيبة قداش نتوحش ايامك…وحنانك …وطيبتك ..
انا ما نحبش البكاء على الاطلال اما الوقت اللي انا فيه هو اللي جبرني باش نبكي على الاطلال وغير الاطلال ..
راني نبكي حتى على الكانون اللي طفا …والشكشوكة اللي مساطت …
يرحمك يا امي …ويرحم ايامك …
