كتب صالح الحاجّة
احنا التوانسة مغرومين برشة بتقديم الدروس والنصائح والتوجيهات لبعضنا لوجه الله ودون مقابل..
ننساو همومنا ومشاكلنا ونتلهاو بالناس وهات بركة واحد يقع في مشكلة والا حتى يمرض نوليو خبراء وأطباء وحكماء …
يبدأ الواحد منا مكسر ومدقدق وطايح وفالس ويدهدس ويقول لصاحبو : اعمل هكة وهكة وتوة تشوف كيفاش امورك تتحسن …والا يقلو : خويا العزيز بيع اللي قدامك واللي وراك وطلق وزيد فيه ..واذا كان مريض يقلو : اشرب شوية زيت وكول فص ثوم وانس المرض …
الدروس والنصائح للاخرين عندنا منهم بالبالة ولذلك عندنا مثل شعبي قديم يقول : لو كان وريت الضوء لعينيك لكان خير ..
كان عندي صديق جلطام شوية فالس ومجرتل ما عاجبو شيء أما عاجبتو روحو …نهار كامل يحكيلك على عبقريتو وبطولاتو وصولاتو وجولاتو … والناس الكل عندو واحد من اثنين …ياخبيث ومجرم وولد حرام …يا بهيم متخلف ومصطك …
الشيء الوحيد في الدنيا اللي عاجبو ومعجب بيه هو حضرتو..
