كتب: محمد الحمّار
في فترة المراهقة ثم الشباب في الربَط، اللي ما يعرفنيش بإسمي أو بالكنيات متاعي كان يَعرفني بـ”هاك اللي يلبس سروال دجين، وإلا بـ “هاك اللي بالبلوزون المارون” وهلم جَرّا. كل حِقبة زمنية والأمارة متاعها.
صورة متكاملة
أني كنت معروف بلبسة كذا أو كذا ماكانتش مقصودة. وقتها ثمة ذَوق عند الشباب لكن ما ثماش fast fashion كيف اليوم. كُنا كل واحد عندو “جِرتيلة” وإلا اثنين يُظهر بيهم ديمة. ولو أنّهم من الموضة متاع وقتها إلا أنهم يعِيشو مع مولاهم، الشي هذا كان باهي لأنو يكَمل شخصية الواحد مِنا.
بالتالي الواحد كان معروف موش فقط بأفعالو وبأقوالو وبمستواه الثقافي والأخلاقي والاجتماعي. كان معروف بهاذوكم الكل وزيد عليهم اللبسة. كانت ثمة صورة كاملة ومتكاملة.
الكَثرة وقِلة البَرْكة!
اليوم في عصر الوفرة والعولمة الصناعية و التجارية و الثقافية والسلوكية، ثمة الكَثرة وقِلة البَرْكة. داكوردو اليوم يعرفوك بأفعالك وبأقوالك وبمستواياتك المتعددة، لكن ماثماش هاك اللمسة التكميلية. تلبسش عشرة سواري وخمسطاش سروال وعشرين سبادري وصباط، كل يوم قطعة، ماتظهرش كامل.
مع أنّ l’habit ne fait pas le moine، إلا أني نعتقد اللي لازم الواحد يكون راضي على نفسو وقتللي يشوف المجتمع راضي عليه. هالرضا هو اللي كان موجود واندثر. هو اللي كان تفعيل يومي للمعنى والدلالة والأبعاد متاع المثل الشعبي “كول على كيفك وإلبس على كيف الناس”. مع العلم أنّ المثل مايعنيش اللي الناس يمِلّو عليك آش تلبس لكن معناه الناس يحِبو يعقلوك بعلامة مميزة، وهي لبستك وما يهمهمش آش تاكل. اللي تاكلو موش تابعهم إنما اللي تلبسو تابعهم لأنو في علاقة بتواصلهم معاك.
هاو الحل!
يقول القايل بش نطَيش الحوايج (الدبَش) اللي عندي الكل ونتزَهّد وإلا نوَلي كي جماعة hippies متاع الستينات وإلا كي زمرة gitans؟! لا، خاطي خوك. آنا طُحت للظاهرة متاع الfast fashion كيف معظم الناس في جُل أنحاء العالم ومانيش نادم.
آما الحل اللي نشوفو صالح على خاطر فيه مزج بين الماضي والحاضر هو أن تبقى التبديلات (outfits) متاعك متنوعة وثرية ومزيانة لكن حاول رَكّز مع قطعة متاع ملبوس خارجي. قطعة وحدة دون سواها (تنجم تكون سورية أو مريول أو سروال أو فيستة أو بلوزون) والتركيز متاعك يتمَثل في لَبسانها أكثر وقت ممكن وأكثر أيامات ممكنة وبَدِّل لُخرين قَدّ ما تحِب.
