كتب: صالح الحاجّة
من اللي انا صغير نموت على الكسكروت بالتن …
نحب الكسكروت المشخشخ ..الحار …الموزوز ..
كنت ما ناكل كان كسكروت ‘نانو’ اليهودي ربي يرحمو ..
كنت نمشي الى نهج باش حامبة مقابل جريدة الصباح وناخو كسكروت نقعد نتبنن فيه نهار كامل …
والديموقراطية اللي كنت نقرا عليها …ونسمع بيها سمع …كانت في خيالي بنينة كي الكسكروت …
كنت نشيخ بالكسكروت …ونشيخ بالديموقراطية …
أعوام عمري عديتها ناكل في الكسكروتات ونتبنن في الديموقراطية ..
وبرة يا زمان وايجا يا زمان الكسكروت ماعادش كسكروت …والديموقراطية يسلم عليك العقل …
