كتب: صالح الحاجّة
نحب نهنيكم ونبارك لكم ونفرحلكم ..
هيا خويا العزيز اطمان هاك بش تولي تلقى دبوزة الماء متوفرة ومكدسة…وما عادش تجري من بقعة لبقعة وتشد الصف ويطيحولك قدرك..
سمعت كيفكم اليوم في الاخبار اللي الازمة بش توفى ..وايامات وتنتهي حكاية الماء على خير …
الحمد لله ما يدوم حال..والدنيا دوارة يوم ليك ويوم عليك …
اما تمشيش تنسى اللي هوما يشربو فيك ويوكلو فيك ..
ماتنساش اللي لو مش هوما راك حاير في شربة ماء …
الحمد لله كثيرا اللي ثمة شكون يفكر فينا ويدافع علينا ويضرب بالبونية باش احنا ما نعطشوش ..
نحبك خويا ماتنساش الماء والملح …وتعترف بمعروف أهل المعروف …
هيا صفقوا وزغردوا وافرحو وغنو وارقصو وعيطو : الماء رجع ..الماء رجع ..
هيا العاقبة للضوء ..
وتكبرو… وتنساو ..
