كتب: صالح الحاجّة
في تونس ماثماش اسهل من انك تحط اللي تحب عليه في مكتوبك …
كل شيء بامكانك ان تحطو في مكتوبك ولو بعد حين..
شوية ذكاء …شوية ديبلوماسية …شوية وقت يجي في مكتوبك ويركش …
أما الشيء الوحيد اللي انت تحطو وفي بالك تهنيت عليه …ومشى في بالك طاحلك …وولى انتاعك ..واذا بيه يطير كيما يطيرالعصفور …
وفي رمشة عين تضرب عليه ما تلقاه …
تعرفوش اشكون؟
راهو سي الدينار …تضرب عليه في مكتوبك ما تلقاه ..
باسم الله وبالله تقولش عندو جوانح..
على التلفيتة كان هنا …ما يسخنش بقعتو …ويهرب عليك …وتحسو كانو يضحك عليك …
