كتب: صالح الحاجّة
يمشيش في بالكم اللي مسلسل ” شوفلي حل ” هو الأكثر اعادة واقبالا في تونس …
مانعرفش من قداش ها المسلسل قاعدة التلفزة تعاود فيه والتوانسة يتفرجو فيه كل يوم …
سنوات وراء سنوات وهو “سيدي حاضر يا شكاية”…
لوبانة ما فدوش منه التوانسة ..
ومع ذلك انا ازعم ان التوانسة عندهم مسلسل اخر عايشين بيه وعليه توة قرون …
يوميا ها المسلسل يزيد وينقص أما ما يغيب على طعام …
والتوانسة بيدهم وبكلهم يشاركو فيه بالتأليف والتمثيل والإخراج والتصوير ..
مسلسل من انتاجهم وابداعهم وتفكيرهم …
كل مزرق شمس النبي مولاك يتوكلو على الله ويشاركو في إنتاج مسلسلهم الوطني ..
تعرفوش اسمو ها المسلسل اللي ما ماتش وهو حي من قبل حنبعل ؟..
ما اطول عمرو …
وما اعظم شانو …
قرون تعدات …وعهود وفات …واجيال كلاها الدود والتراب وهو سيدي ما على بالوش …
عرفتوه ؟..
نسهل عليكم ونقلكم عليه …
المسلسل الابدي والازلي والمزمن اسمو ‘المصلحة’…
التونسي يموت على المصلحة..
مصلحة روحو ولا يرحم من مات…اعطيني مصلحتي وتبكي انت على أمك وما تبكيش أنا على امي …
وعلى خاطر مصلحتو التونسي يبيع اللي قدامو واللي وراه …
ويوفى الحديث …
