وجه ماهر الهمامي نقيب الفنانين النداء التالي:
في هذا الظرف الدقيق، الصمت خيانة، والسكوت على تهميش القطاع الفني أصبح مشاركة في الجريمة. نحب نحيي بكل فخر الفنان الكبير غازي العيادي على موقفه الرجولي وكلامه القوي، كلام فنان مسؤول تقلّد منصب نقيب ويعرف معنى الدفاع على زملائه. هذا هو الموقف اللي يشرف.
ألف شكر ليك غازي، على صوتك اللي كنا محتاجينو، وعلى إخلاصك لقطاعك.
أما لبقية الفنانين، نقول:
إلى متى السبات؟ إلى متى الخوف؟
إذا اليوم ما تدافعوش على مستقبلكم، متى؟
إذا ما تخرجوش من صمتكم، شنوّا باش يبقى؟
قانون الفنان ما هوش ترف، هذا حقكم في الحياة بكرامة. واللي ساكت اليوم، غدوة باش يندم.
تحرّكوا.. تكلّموا.. واجهوا.
راهو كل صوت ساكت هو دعم للظلم، وكل كلمة صادقة تنجم توقظ ألف غافل.
نداء إلى نواب الشعب:
نحملكم المسؤولية الكاملة، اليوم قبل غدوة.
قانون الفنان ما يستحقش تأجيل، بل يستحق جلسة عامة عاجلة، قبل العطلة البرلمانية. كفاكم تجاهل لقطاع أعطى لتونس من روحه، واليوم يطالب فقط بحق البقاء والكرامة.
نداء إلى الرأي العام:
الفن موش ترف، الفنان موش كائن هامشي. راهو صوتكم، صورتكم، ثقافتكم.
لا تكونوا شهود زور على تهميشه.. ساندوهم اليوم، قبل ما تفقدوهم غدوة.
