كتب: الأمين الشابي
حياتنا اليوم مع الفايس بوك، وفايس أمك، والواتساب وتيك توك صبحت، بلا عقال ولا رباط، مجنونة بنت مجنونة في هذا الشهر الفضيل يا تحفون و يا تحفونة…
هذي تعري وهذا يوّري والآخر يشتم ويسب في النّاس ويجري. قال اشنوا أحنا أحرار ونقول كلامنا جهار بهار ولا حزاز ولا قهّار، ما دامنا وراء الحاسوب وإلاّ الهاتف الجوال واضرب يا طبال.
الدنيا ولات بلا قيود، هذا جنّح وغيرو قعود، والآخر عامل فيها بو صيود يكتب ويميّل في راس، ولا يهمّه من راسه ولا من ساسه. يشتم ويذّم ولا حب يفهم روحه ويتلم. وحين تجيه ضربة فم فم، لا تقرأ ولا تكتب ولا تفهم. وقتها تسمع أغنية حبايبي ظلموني وللحاكم اشكوني. وترصيلو في مديدة توريست في سويسرا فماش ما يتربى ويتلم.
يزي من التبذير!
أمّا سعاد وسعدية و حلومة، ما عندهم كان الأفكار التحفونة، النهار الكل في ها الشهر الفضيل، ما تهمهم كان المظاهر والفخرة بلا حشومة. هام هبطوا على الفايس ماكلة على كلّ لون يا كريمة. قطايف وغلّة وكروفات ولحومات مفرومة. والخبز بأنواعو من العادي للمبسس و لخبز الطابونة. ولا فكّروا في الزوالي اللي معدتو تهارات من البريك بالبطاطا والبايت لأيام معدودة. اسمعوا بنياتي نصيحة عمّك سلومة، يزي من التبذير يا مهمومة. وشطّر الماكلة في الآخر مصيرها القمامة يا تحفونة. وزيد أنت تكرّس في الفوارق وتجعل الغير ينقم عليك يا مجنونة.
‘الشهاوي والتمخيخ’
أمّا زادة ثمّة من نوع من العباد، ملهوفة، تشري وتكدّس وتفندق في الفلوس بلا حساب. بالله راهو شهر التقوى، مش شهر السباق في الفساد واشكون يصرف أكثر من العباد. بالله علاه خليتو شهر الصيام وشهر العبادة والتقرب للمولى والابتهال، خليتوه شهر الشهاوي والتمخيخ، حلو ومالح وسهر في الكازينو والقهاوي وقمار وفلوس من تحت لتحت عاملة شهاوي.
