كتب: سمير الوافي
أنا بيدي باش نولي نتكتك على أيامي وعلى سعدي…وباش نهاجر للتيك توك قاللك غادي الكلام بالفلوس…و’التزعبين’ بالفلوس…تي حتى الغمزة تخلص عليها…تي الكلام اللي تحكي فيه في القهوة والا في الحمام يسوى برشة فلوس غادي…
وبما أني كلامنجي ومتكلماني…فاش قام نكسر في راسي ونكتب بلاش ومقابل جرد جامات وجادورات وساعات نزيد نتسب مللي يسوى والا ما يسواش…ويخرجولي إشاعات ويفبركولي تسريبات…تي ماو نولي اللي نكتبو نمشي نحكيه في فيديوات في التيك توك ونجرب حظي…لعل تخطف…ع الأقل نتسب وأنا خالص خير…!!!
تي قد ما باش نخلص م التلفزة كي نرجع…مستحيل نصور عشرين مليون في الساعة حتى لو انتدبتني قناة روتانا…الا اذا واحد خدم في قناة ” بورنو هوب ” حاشا ها العواشر…عاد الواحد إلى جانب نشاطو التلفزي الكاسد…يمشي يتكتك على ايامو في التيك توك والله غفور رحيم…والسلام بالعافية…!!!
