كتب مغني الراب أرماستا
ما نعرفش علاش كل ما يعمل مغني راب مشكلة، تولّي فوازير: «هاو فلان، هاو فلتان»… والناس الكل تتسبّ وتتّحط في شكارة وحدة.
يا جماعة، المخد.رات آفة تغلغلت في المجتمع وضربت قطاعات الكل: أطباء، رجال أعمال، سياسيين، محامين، قضاة، رياضيين وغيرهم… الكوكايين ومشتقّاتو ولات متوفرة بطريقة تخوّف، وكأنها أسهل من الماء.
أما علاش كل مرة تصير مشكلة، نمشيو مباشرة للراب ونحمّلوه المسؤولية؟
لطفًا على صغارنا. ربّيو صغاركم، تبعوهم، اسمعوهم، وعّيوهم.
موش تجيبو صغير، تهملوه، تخليوه وحدو قدّام الإنترنت والشارع، وبعد كي تصير مشكلة ترميو بلاكم على الراب والفنانين.
الراب موش هو اللي ربّى صغاركم.
والفنان موش هو المسؤول الوحيد على تربية جيل كامل.
المخد.رات مشكلة مجتمع، والتربية مسؤولية عائلة، والمدرسة، والدولة، والمجتمع الكل.
حاربوا المخد.رات، حاربوا الترويج، حاربوا الإهمال والجهل… أما ما تجعلوش الراب شماعة لكل فشل.
وما تحطّوش الناس الكل في شكارة وحدة.
الغلط يتحاسب عليه صاحبو، موش يتحاسب عليه فن كامل وجيل كامل..
