كتب عبد الحميد بوشناق
موسم المهرجانات الصيفية و بطبيعة الحال موسم السب و الشتم و التنمر على كل متفرج “ة”يشطح و إلا عامل”ة”جو على روحو”ها” و يصوروه(ها) في الصفحات اللي بش “تغطي” المهرجانات!
وتبدا اكالصفحة شايخة عالسب و الكره و البغض متع شعبنا العزيز الغالي ! و يتصدر الترند موش الفنان بل جمهورو ! و هكا يكونو الصفحات ساهمو مرة اخرة في التنكيل بالفن و جمهورو و يواصلو في التيار اللي ما وصلنا كان للموضة العامة متع قلة التربية المقننة و المغلفة بكلمة”نقد” و “حرية تعبير” اللي ما نراوها كان مع الفنانين و الرياضيين و الباقي … الصمت المهين .
مقتطفات من بعض التعاليق الصيفية الموسمية الي بش نراوهم مرة أخرى :
“توا هذا فنان”
“يا حسرة على قرطاج كي كان ”
“عرس فوق سطح”
“كي يزيدوني الفلوس ما نمشيلوش”
“كان عطاو الفلوس للسبيطارات اهم”
“الشيب و العيب”
“هذا خاطر بعدنا على ديننا”
