متقاعد يحكى لكم: حزب ‘صبوش’ أكبر حزب في تونس ..وبعده حزب ‘الهندي المقشر’..

كتب: صالح الحاجّة

فئة كبيرة من الشعب التونسي يتمتعون بالتقاعد و لا يشغلهم الا أمر واحد وهو جراياتهم الشهرية ..واللي تاعب تاعب ..والمريض مريض..والمحبط محبط …وقليل فيهم اللي بايعها بلفتة …أما القهاوي تلمهم الكل..

فئة اخرى من الموظفين من صنف مسمار في حيط يقضون أيامهم في انتظار اخر الشهر موعد الشهرية ..يعني حزب ‘صبوش’ …وهو أكبر حزب في تونس…
فئة ثالثة قشارة و بزناسة يتقنون لعبة ‘تدبير الراس’…ويعرفون من أين تؤكل الكتف …وما على بالهمش …وكيف المنشار طالع ياكل هابط ياكل ..
فئة رابعة تتكون من الذين يعيشون ويقيمون في الخارج ولا تعنيهم إلا تسعيرة العملة الأجنبية بالدينار التونسي..
واللي تبقاو من التوانسة يحبوها جراية وسباقة وما تاكلش الشعير …ويموتو على الهناني بناني..يعني جماعة ‘اخطى راسي واضرب’ ..وخليني ‘مستكوزي’ ..و’اللي تراه راكب على فركة قلو مبروك الحصان’..وهؤلاء يشكلون ثاني أكبر حزب في تونس حزب ‘الهندي المقشر’..
وبرة انت حلل واشرح واستنى يا دجاجة يجيك القمح من باجة..
وارجوك ان تفهمني بسرعة.