كتب: محمد الحمّار
نعرف اللي ثمة برشة ناس قايمين بدور المساعد أو aidant لقريب مصاب بمرض العصر الجديد، بعد السرطان، اللي هو ما يسمى démence بأنواعو الخمسة واللي الناس يسميوه زهايمر في وقت اللي هذا الأخير واحد من خمسة أصناف كلهم يشتركو في بعض الأعراض لا غير…
عبرة أو نصيحة
حسب تجربتي كمُعين أو مساعد (aidant) نحب نعَبر عن بعض الأشياء عسَى القراء المساعدين لمريض يلقاو في النص هذا تشابه أو تطابق مع الحالة متاع المريض متاعهم ياخذو عبرة أو نصيحة أو فكرة تساعدهم، كيف ما آنا انتفعت ببعض الحاجات من بعض المنتديات متاع المساعدين للمرضى.
في البداية، راهو موش كل démence إسمها زهايمر. مثلا ينَجمو الأطباء يرجحو أن مريض معيّن مصاب مثلا بالنوع متاع الديمونس démence اللي يتسمى علميا DFT أي Démence Fronto-temporale بينما الأهل متاع المريض يسميوه زهايمر.
أعراض
هذا يعني، في الحالة هاذي، اللي المساعد يلزم يرد بالو من النوع هذا باعتبار أنو ماهوش زهايمر. راهو المريض بيه يتوفى بعد 5 أو 7 سنوات موش 10 سنوات أو أكثر مثل زهايمر. أما أهم خصوصية متاعو فهي فقدان اللغة تدريجيا لكن بسرعة غريبة. المريض يوَلي ماعادش ينجم يقول جملة بل بعض العبارات كيف “يعيشك” و”اي” و”لا”. ثاني كارثة متاع هالمرض هي نسيان، موش الأحداث الجديدة فقط، وإنما نسيان القديم والجديد فَرد مرة. ثالث حاجة، المريض يوَلي يوَسخ في ملابسو ويفقد المشي لبيت الراحة. رابع حاجة، يفقد التوازن في المشي و في آخر حياتو يوَلي يطيح وأخيرا يبقى شهر أو اثنين في الفرش. خامس معضلة، المريض ماعادش يبلع لا ماء ولا ماكلة. يوَلي يشرب بمغرفة القهوة وياكل حاجة مرحية ورطبة.
بعد هذا، حبيت نقلكم مايهمش وقت الأقارب ما يتلهاوش بالمريض مع المساعد في جانب التمريض والتنظيف. راهم ما يصدقوش اللي صاير. ما يصَدق وما ينَجم يفهم المريض ميا في الميا إلا المساعد متاعو.
الاستنتاج الثالث، راهي اللهوة بالمريض من الصنف هذا تتطلب برشة صبر ودم بارد وقوة جاش. حتى كان المساعد ماهوش صبور، راهو يتعلم الصبر مع تقدم المرض.
الاستنتاج الرابع، راهو مساعد المريض مهدد بزوز حاجات: من جهة، مهدد بالمرض النفسي جراء الحزن والضغط. في الوضع هذا، الحل هو تبديل الجو (مشاهدة فيلم، مشي، فوتينق الخ). من جهة ثانية، راهو مهدد بتوَعك في الظهر والعمود الفقري. في الوضع هذا، لازم توخي الحذر الشديد و لبسان سبتة خاصة بحماية الظهر وقت هزان المريض من بلاصة لبلاصة ولو في نفس الغرفة.
باش ما يندمش
آخر استنتاج، أيّ دواء يستهدف المرض هذا بالذات راهو لا طائل من وراؤو. بخلاف شوية دواء وجيعة أو دواء ضد احتباس الكرش و فيتامينات، الباقي زايد أو مُضر.
ممكن نسيت حاجات لكن أهم حاجة هي أن المساعد لازم يعمل كل ما في وسعو بش يعملو بش ما يندمش وقت ربي يهز متاعو.
ربي يعاون المرضى ومساعديهم ويثيبهم لا سيما أنو ماعادش السرطان هو مرض العصر وإنما démence من زهايمر وما شابهها.
