يكتبها: الأمين الشابي
برشا ناس ما تكسب من راس المال كان الغدرة والبلوط والتبلعيط. ويا ناس ما كان باس. النهار الكل وهوما يصطادوا في الغافل ويمشي الجافل ويجي الغافل. وعمّك سلومة، رغم تجربتو في الدنيا، يحصل في المنداف..وخلص ثقيتو ونيتو الطيبة بالآلاف.
ضربة ضربة للعنكوش
ما نطول عليكم الحكاية، عندي صديق متلازمين ديما من البداية للنهاية. في كل بلاصة ديما ما بعضنا وما نتفارقوش. حتى جاء نهار ضربني ضربة للعنكوش. جاني يشكي ويبكي وقالي يا صاحبي كان ما تمنعنيش أنا دغري للحبس وخلّي نسكت ومانحكيش. قالّي راني تغصرت في شوية فلوس، وما لقيت بها وين، مديت إيدي لكاسة الغير، وخذيت ما يلزمني من الفلوس. وفي نهارتها فاقوا بيّا ولزوني نكتبلها شيك وإلاّ يشكوا بيّا. وأنا خوكم سلومة الحكاية جدّت عليّا، بحكم ما بيناتنا من عشرة وأخوية. أعطيتو 4 آلاف دينار ووعدني باش يرجعهم في أقرب الآجال.
فص ملّح وذاب
وهذا نهار، وهذاك نهار، وصاحبنا فص ملح وذاب. مشيت نسأل في خدمتو، قالولي عندو مدّة ملّي غاب. وفي صيف من الأصياف، كنت مصيف أنا والعايلة في مدينة ساحلية، وإذا بها تقع عيني على بلاكة كبيرة تحمل نفس اسم صاحبي العلاّني ومكتوب عليها الأستاذ الروحاني فلان الفلاني…
قصدت ربي للبلاصة وقلت برّا نشوفو عندو ها الأستاذ ونطرح عليه الإشكال. والمفاجأة أنّ ها الأستاذ الشواف ظهر هو صاحبي المحتال. ومن الغصرة عرضلي بالحملة والبوس باش ما نفضح سرّو بالمكشوف. و مدلي البعض من الفلوس ( 200 د) بالتمام والكمال ووعدني باش يبعثلي البقية في ماندة الكترونية وطلب من عندي حتّى العنوان.
اسأل على خونا استغناش
واستنيت الماندة أيام وشهور وأعوام. ولليوم بعد 20 سنة ما ظهرش قدّها المزيان. وارجعت مرّة أخرى لمحل الشعوذة امتع صاحبنا في المدينة الساحلية. لقيتو نقل وعاود فصل جديد من التحيّل عليا. وها الحكاية ما هياش من نسج الخيال. وروسكم يا رجال هي حكاية واقعية، وكنت فيها أنا ضحية.
ولليوم بقية فلوسي ضاعت عليّا، وهاني ساكت حتى لين يستقظ ضميرو ويرجعلي القضية. وكان قرأ ها الحكاية يزرب ويرجعلي صواردي ومعاهم يهديلي غناية. يطلب فيها السماح والهداية. وإلاّ قدام ربي لاني مسامحو جمليّة والخليفة عليّا. وردّوا بالكم ما هك الجماعة اللي راس مالها كان الكذب والبلوط و التبلعيط و ترسيلكم تستنوا وتيوسوا كيفي في الحيط.
