كتب رياض جغام
زبيّر بيّة كرامتك سيّدي محفوظة ما دمت تحفظ كرامة ليتوال…واحترامك حقّك علينا كـ ‘إيتواليست’ و كلاعب دولي قائد للنّجم وكرئيس شرعي لـ ليتوال…
ولكن سيدي صحة الرأس و الغرور و التّعالي و التكبّر و ادّعاء الحكمة و امتلاك الحقيقة و منطق ‘إش يا ذبّانة’ هذا سلوك يعنيك أنت في حياتك الخاصّة ولكن نحن على يقين من أنّه لا يمكن أن يقدّم لنا مسؤولا ناجحا..
نريدك أن تبقى رئيسا للنّجم باع و ذراع و إنجازات و قرارات و لمّ شمل و تقريب الكفاءات و التّعويل عليها في موسم المأويّة الذي من المفروض أن يشتعل فيه السّاحل ونصنع الحدث و يستعيد النّجم توهّجه واشتعاله…موش نصبح أضحوكة و الحيط القصيّر اللّي يجي يفحّج و يركب و برشا تمرميد وتشليك و تطييح قدر…
لماذا الجحود؟
تعاملك مع محمّد المكشّر بقطع النّظر عن الإبقاء أو الإستغناء عليه فيه برشا جحود…تعاملك مع الدّكتور العكروت و لن نخوض في التّفاصيل فيه برشا جحود…تعاملك مع من وجدهم النّجم وقت الحاجة ممّن قدّموا مئات الملايين لتخرج
وتحكي عن صراع عائلات وهمي لا اساس له من الصحّة فيه برشا جحود…إصرارك على المدرّب لسعد الدّريدي و تمسّكك به و حمايته رغم تغفيصه وهزّانه و نفضانه من دون محاسبته وتنكّرك لتقاليد النّجم بما يسيء لاسم الفريق و تاريخه و هيبته فيه برشا جحود…
خروجك بعد الفوز على قابس بتصريح عنتري تقول فيه أنّك لا تقبل من النّاس و الأحبّاء دروسها ولكنّك يا حبيبي تتصرّف بفلوسها و هذا جحود …ناس يعلم بيها ربّي تنحّي من لحمها و الدّكتور العكروت يدور في الساحل حومة حومة و زنقة زنقة باش يجيبلك المليارات و من بعد تخرج أنت تتسردك و ترفض الدّروس؟؟…
فمن ينتدب كميونة اللاعبين المضروبين من الحسن دياو إلى ماهر الصغيّر لا يستحقّ دروسا فقط ولكن دروس خصوصيّة و دروس تدارك …
هناك مشكل في ليتوال
سيّدي رئيس النّجم …هنالك مشكل في ليتوال…هنالك أزمة …و المطلوب منك يا رئيس أن توفّر الحلول وتتّخذ القرارات و تفرّ بالنّجم من العبث و الكارثة…أنت أمام امتحان ثاني …لأنّ امتحان تركيز فريق يليق بالمأويّة و احتفالاتها يبدو أنّك مررت بجانبه …اليوم أنت أمام امتحان حقيقي و لا نتمنى لك إلاّ النّجاح في العودة بالفريق إلى مساره العادي على الأقلّ…
