كتبت: عربية حمادي
صحّة شريبتكمصحيح واقعنا و فمّا في شوارعنا و معاهدنا ما أتعس
آما السّؤال الي ديما في مخّي
ياخي و الهروب من الدّار و الزّواج العرفي والعلاقات غير الشرعيّة و الهمجيّة و قلّة الحياء و التّطاول على الأساتذة و على الوالدين و على الي أكبر منّك…. باش يكونو ديما ها المواضيع سيناريوهات الدّراما في بلادنا إلّي نشوفوها مرّة في العامّ وإلّي المفروض تلمّنا كعايلة نتفرّجو في منتوجنا؟؟؟
ما عدناش قصص نجاح ما عدناش ورد نبِت حاشا من يقرا في الزّبلة و قلِب المزبلة حديقة؟
ما عدناش نساء ضحّت و مضحّية على ولادها باش ينجحو في حياتهم و فعلا نجحو و وصلو؟
ما عدناش شباب قرا و تخرّج و بطّال و قاعد يحاول يكمّل حياتو؟
ما عدناش رجال خلقت من ضعفها قوّة و خدمت و ربّت و كبّرت و صرفت و وصّلت ولادها لأفضل البلايص؟
ما عدناش شهداء ضحّوا بحياتهم على خاطر بلادهم؟
ما عدناش بوليسيّة و جيش رجليهم طايبة من الوقفة في الشّوارع و الحدود مضحّين بعايلاتهم باش يحمو البلاد….؟
ما عدناش أمل نجّمو نسوّقولو في درامتكم و نماذج نجّمو نعرّفو بيهم و شخصيات ممكن تكون قدوة للمراهقين و الشباب باش تتكسّر الصّورة السّيئة في مخاخهم إلّي كلّ عام تزيدو تسطّرو علاها في مسلسلاتكم و تروّجولها على إنّها قاعدة عامّة في المجتمع ؟؟؟؟؟
آش يجاوبوك كيف تطرح ها الأسئلة
الدّراما ما تقدّمش حلول
الدّراما تعرّي مشاكل المجتمع
إي باهي هاو في بالي
