كتب: مقداد السهيلي
الوان مان شو والإنتهازية : هو صحيح يبدو للبعض أن الفنان اللي يعمل وان مان شو إنتهازي … يحب يطلع وحدو على الركح يعمل سويعة ونص تمقعير ويفرق مرشانة عالفريق ويحط الملاين في مكتوبو …
زعمة زعمة ضمار
هذا الظاهر واللي ينجم ينطبق عالاغلبية الساحقة اللي يبيعوا في كذبة مصدقينها والجمهور ماشي في بالو داخل يتفرج في وان مان شو … أما الحقيقة والواقع ما عندو حتى علاقة بالحكاية هاذي … على خاطر اللي يعملوا فيه هوما وتستهلكوا فيه انتوما ماهوش وان مان شو … هو ‘ستاند آب’… يعني كسوة كحلة وسبادري والا روبة كحلة وروك … وشوية نكت مربوطة بطرف تل … زعمة زعمة ضمار .. وروح خفيفة …
حكاية أخرى
أما خويا الغالي … والحاضر يبلغ للغايب … الوان مان شو حكاية أخرى … الوان مان شو … نص مكتوب … حكاية متسلسلة … كوميديا … دراما … تقمص شخصيات مختلفة … صوت قادر على الغناء والتطريب … عزف على آلة موسيقية وترية .. عزف على آلة إيقاعية … يعني عمل ما ينجم يقوم بيه كان فنان شامل بالفعل … واللي هو موش موجود … وبكل ثواضع وإلا خلينا مالتواضع الفارغ .. مافمة كان أنا اللي ينجم يعمل الوان مان شو على قاعدة صحيحة … بشهادة أكبر النقاد في البلاد …
فاض الكأس!
وهذا كلام اضطريت باش نقولو كي فاض الكاس … ولذا ماعادش تغلطوا الناس وتهضموا حق الفنان الغلبان اللي يموت بالتعب عامين كاملين باش يحضر وان مان شو كيما يلزم وتحطوه في شكارة مع الفكاهجية والنكاتة … عيب كبير … إحشموا على رواحكم…
