كتب: محمد الحمّار
العرب الباهين (اللي موش مطَبعين)…والعرب اللي موش باهين (المطَبعين) يتشاركو في حاجة خايبة برشة. كانِك من المطَبعين، بطبيعتهم مطبوعين بطَابع التبعية والتقليد الأعمى.
كيف ما قال لآخر”اسئِل على صاحبك استغناشي، آما الطبيعة هي هي”. وكيف ما يقول الأثر “وما بالطبعِ لا يَتَغيّر”:
وكانِك من اللي موش مطَبعين، هومة راهُم لاهين بأفعال مُهمة لكنها ماهيش الأهم. لاهين بأمور سطحية كيف المقاطعة الاقتصادية وكيف التنديد بالمجازر في جلسات القهاوي وفي الأخبار وبالفُرجة في الخراب والدمار والتصفية العرقية.
اللي ماهُمش يعملو فيه المطَبعين وغير المطَبعين هو أنهم، بطبيعة الحال، ماهُمش يبنِيو في حياة أفضل ليهم ولصغارهم ولشعوبهم. يقيمو في الصلاة لكن ما يصليوش (الأمر بالمعروف، التصدي للغش، البحث عن الحقيقة من بين أشياء أخرى)، يزَكيو لكن ما يساهموش في مشاريع تنموية، يصومو رمضان لكن ما يصوموش عن الكذب والغش والهملة وعن سائر الموبقات. يحِجو لبِيت ربي لكن ما يعرفوش بلادهم. مايعرفوش قداش الوديان متَكمين بالفضلات. ما يتصوروش الأوساخ اللي في قاع البحر. ماشافوش الصاشيات فين ترسي وقتللي تقوم رَياحِية.
اللي ماهُمش يعملو فيه المطَبعين وغير المطَبعين هو أنهم، بطبيعة الحال، ما يعرفوش قِمم الجبال اللي فيها. ما يتصَوروش جمال الشلالات اللي فيها. ما شافوش الـ canyons اللي فيها.
راهم مايعرفوش لا الخايب ولا الباهي اللي فيها. وكيف ما قال مولى الغناية: ماشافوهاش هاذي، ما شافوهاش!
