كتب: محمد الحمّار
ثمة ناس ما يعرفوش يكتبو إسمهم على القُلة، كيف ما يقول المثل، ينَبّرو لفائدة إقامة الصلاة في الفضاء المدرسي وضُد اللي ضُد.
هومة ضد اليساريين بوه على خوه، وضد العلمانيين شِيلة بِيلة، وضد الأساتذة والمعلمين قَطع لَفّ. هالأشكال تلقاهم ما يعرفو شنوة معناها يساري إلا في الكورة وإلا في البوكس. وما يعرفوش شنوة معناها علماني. بل ما يعرفوش اللي الإسلام علماني. وما يعرفوش شنوة معلم وإلا أستاذ إلا في المسلسلات المصرية.
هالأنماط من المفروض الفايسبوك يطلب منهم ضريبة مالية. وتكون ضريبة غالية برشة. تكون غالية بشكل يخليهم غير قادرين على تفريغ قاذوراتهم الكلامية على الضمير العام.
ربي يتوب عليهم ويَرجعو لرَبي خَير رجوع. الله اللي قاللهم بالحرف الواحد {يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ}، بينما هومة لا أطاعو الله ولا الرسول ولا أولي الأمر منهم.
ما أطاعوش مادام نَصّبو أنفسهم بأنفسهم أولي أمر. نَصّبو رواحهم أوصياء على المُفكر وعلى المعلم وعلى الأستاذ وعلى الإطار وعلى السياسي.
هاالفئات تقتات من الفُتات. من الفتفات. هومة تَفتافَة، يِسْتقاتو من شظايا المعلومات. بالتالي المجتمع ما يلزمش يتَبعهم. المجتمع يلزم يقوللهم “صَلي وارفَع صَبّاطك”
