كتب: وائل عبده
احمد فتحي الممثل الطيب ده
كان ساكن في امبابه وظروفه زي شباب كتير
سكن بسيط جدا ومافيش شغلانه عدله بـ يكمل فيها
يعني بـ ببساطه شاب مصري مش شايف مستقبله
فـ يوم كان عند واحد صاحبه في مناسبه
شاف اخت مرات صاحبه هناك ولفتت انتباهه
وكـ شاب مصري اصيل اعجب بيها وحبها بسرعه
عشان معروفين احنا بـ قلبنا الكبير والسريع فـ الحب
بس الغريب انها برضو اعجبت بيه ..!
انا بقول الغريب لان احمد فتحي من غير مثاليه
مش الشاب الوسيم اللي يخطف قلب البنت
من اول نظره ويعلقها زي شباب كتير
لا هو زي ماهو بيتريق على نفسه في معظم افلامه
بس سبحان الله القبول مش بـ الشكل
المهم راح اتقدم ودخل البيت من بابه
وزي ماهو بيحكي اهلها ناس مرتاحه جدا
مسافرين بقالهم سنين شقتهم 250 متر وكبيره جدا
يعني بالنسبه له ولـ وضعه وسكنه وظروفه
صعب يتقبل وكان حاسس انه هيترفض
اتقدملها ورغم البعد الباعد بين مستواهم
امها وافقت … عشان بنتهم حبته وقالت عايزاه
وكـ ام عايزه تشوف بنتها في مستوى كويس
قالت اشوف شقتك الاول … وبعدين نتكلم
راحت الســت تشوف الشقه وشها قلب واتخنقت
شقه 50 متر في شارع ضيق في حواري امبابه
يعني حاجه غير مستواهم خالص … قالت
– انت دخلت شقتنا
وشوفت المستوى اللي بنتي عايشاه
ومن غير زعل بنتي صعب تعيش هنــا
رد بـ بساطه
– حضرتك دي امكانياتي
الشقه دي بتاعت والدي مش بتاعتي كمان
بس اوعدك لما ربنا يكرمني ويفتحلها ليــا ولهــا
هجيب لها احسن واوسع منها الف مره
ربنا يكرم رقبتي ليها العمر كله
طبعاً حماته وحماه ماقراش معاهم الكلام ورفضوه
بس اللي اتمسكـ بيه رغم كل ده … هـــي
واتجوزت هي واحمد .. بـ الفعل
وللأسف احمد كان حاله واقف هنا كـ العاده
فـ سافر الخليج يعمل قرشين يستر بيهم نفسه
اشتغل في محل موبيلات …. برضو الدنيـــا واقفه
اتصل بيها عشان يحلها من اي ارتباط
عشان مايضيعش مستقبلها وقالها
– انا ادامي مشوار هـ مشيه ومش ضامن
من غير تفكير قالتله …. انا معاك
رجع مصر وهو مديون بـ 16 الف جنيه..!
تخيل واحد سافر عشان يعمل فلوس يعيش بيها
يرجع مديون فوق ديونه كمان وفـ رقبته زوجه وبيت
لكن هي وقفت معاه وصبرت وكانت فـ ضهره
ودارت الايام واشتغل
والدنيـا جت والفلوس كترت
احمد عارف انه مديون لـ مراته بـ كتير
مش دين مادي اللي هو فلوس ودهب والكلام ده …لا
مديون دين معنوي لـ واحده وقفت معاه رغم ظروفه
وقالت تتجوزه وتعيش اقل من مستواها عشان بس حبته
احمد بقى كل مايجيله فلوس من فيلم او مسلسل
يروح لها جري يرمي الفلوس في رجلها من غير تفكير
كل فلوسه واسراره وحاله ومحتاله في ايديها
هي ابوه وامه وزوجته وبنته وحبيبته
واللي عملته معاه مايتقلش بـ مال
احمد كان اصيل زي ما مراته كانت اصيله
وده اللي خلى حمـاته تقوله من غير كسوف
– انا في يوم كنت هخسركـ ….
لكن ربنا بيحبني وبيحب بنتي وبقيت نصيبها
الغريب واللي انا قولته اول البوست
احمد مش عارف مراته حبتـه ليه اصلا ..!
بنت ماشاء الله جميله
واكيد وهي اصغر كانت اجمل
وهو من غير زعل وسامه مافيش خالص..!
هي من عيله مرتاحه ماديا
وهو مستوى تحت المتوسط كمان ..!
طب يابنت الناس …. بـ تحبيه ليه..؟؟
وشوف يامؤمن مع انه ممثل كوميدي اساسا
ماقالتش بـ يضحكني زي ناس
لا كل اللي قالته …. حنين
ربنا سبحانه وتعالى مقسم للناس ارزاقهم
وانا واحمد متجوزين من 15 سنه ومعندناش اولاد
بس حاسه ان رزقي كله في احمد وحنيته وحبه ليا
عمري ماكنت هلاقي حد حنين كده
دي النماذج اللي انا كـ #وائل بـ تفرجني اوي
بنت اصيله وشاب اصيل
لا فقره كان سبب انها اتنمردت عليه
ولا الدنيا لما جت له اتغير وقلب عليها زي مابنسمع
ولا عدم الخلفه ايا كان من مين السبب انهم يخسروا بعض
اكتر من 17 سنه عايشين مع بعض
منهم 11 سنه في شقه خمسين متر غير الفقـــر
ومع ذلك شالت واتحملت وساعدت كمان ولا اشتكت
وهي اللي اتقدم لها عرسان اعلى من مستواها
وكانت بترفضهم واختارته هو
صدق رسول الله ﷺ
” خير متاع الدنيا الزوجه الصالحه ”
