كتب: سمير الوافي
صديقنا الدكتور مروان القسنطيني عميد كلية ميشيغن في أمريكا…وضيف حلقتنا يوم غد الأحد على ” الحوار التونسي ” …قال لي اليوم خرج يقضي في قضيات…مشى لحانوت في نابل باش يقضي قضية…المرا اللي تخدم غادي دوب ما شافتو قتلو ” موش انت متاع السينوج !!! “…
يعني المرا لا تذكرت ميشغن وأمريكا…ولا منصبو العلمي…ولا مسيرتو العلمية الكبيرة…وتفكرت السينوج متاع أمو اللي حكينا عليه في البرومو…واللي هو رمزيا تعبيرة تونسية في الصميم…
مهما وصلنا في العلم والمعرفة والمناصب…قائد طائرة أو مهندس طاقة نووية أو عميد في كلية ميشيغن…ديما فينا تفاصيل روحانية تونسية ما تتنحاش…لمسات أمهاتنا…معتقداتنا الروحية…حفنة ‘سينوج’ تحطها أمك في جيبك تخليك مرتاح ومطمان حتى لو كنت عميد إحدى أكبر جامعات أمريكا والعالم…!!
بصراحة لازمنا شوية سينوج في البلاطو متاع برنامجنا!!
