كتب: عدنان بلحاج عمر
أنا نتحدّى أيّ واحد يرجع لتاريخ تونس من الإستقلال، و يخرّجلنا خبر رسمي فيه رئيس حكومة (أو وزير أوّل) يستقبل في وزير من وزراء حكومته . تونس ولّا أيّ بلاد متقدّمة .
هاذي بدعة من بدع العهد الزقفوني، شفناها مع نجلاء بودن توّة ثلاثة أسابيع كي إستقبلت وزير الداخلية و شفناها اليوم في إستقبال الحشاني لوزيرة التجارة.
شيء غريب لأبعد الحدود. خبر منشور لمسؤول حكومي يستقبل واحد من مساعديه كاينّو شخص خارج عن نطاقو يقابلو في الصالون و موش حول طاولة الخدمة .
المفروض هو أنّ رئيس الحكومة يقابل وزرتو عشرات المرّات في النهار و يكلّمهم و يكلّموه في التليفون كلّ ما فمّة لزوم . و موش لازم بروتوكولات و صالونات و تصاور و بلاغات و تغطية في الصفحات الرسمية.
كي تولّي محادثة بين رئيس الحكومة و وزيرة التجارة حدث يعلنو عليه، أنا واحد من الناس نولّي نتسائل على كيفاش يخدمو الناس هاذم و هل أنهم يتداولو بجدية في الملفات و يشوفو بعضهم بالكثافة المطلوبة و بلا تكلّف و تشريفات .
