كتب: سمير الوافي
المتفرج فارس…وفمة ‘فرسان’ يستسهلو النقد المجاني الإنطباعي دون دراية ولا معرفة ولا تفكير…فمة فرق كبير بين اللي يخدم ويجتهد ويتعب وبين اللي ينقد ويعلق وينبر…
ورغم النجاح الكبير لحلقة البارح والتعليقات والميساجات الايجابية جدا اللي كنت ننجم نكتفي بيها ونتجاهل بعض الملاحظات السخيفة…لكن نحب نجاوب الأنفار اللي قالوا أني نقاطع ضيوفي برشة ونقص على كلام مهم يحبو يسمعوه كامل…واللي فيهم شلايك ومتخلفين حاشاكم لازم نجاوبهم بقضية ثلب وقذف موش بستاتي حتى لو تعليقاتهم في صفحات أخرى موش في صفحتي…!!
فكرة الحلقة
أولا الضيوف مطالبين بالتقيد بفكرة الحلقة اللي يلخصها عنوانها…وأي خروج عليها يخليني نقاطع ونضبط المداخلة…والا باش نتجاوزو الفكرة والموضوع والوقت…والضيف ما ناخذو منو كان اللي حاجتنا بيه تحت سقف فكرة وموضوع الحلقة والسؤال…الباقي تراه انت مهم وأنا نراه خارج الموضوع وخارج الفكرة ولازمني نتحكم في حلقتي ونسيطر ع الوقت…وهذيكة طريقتي وبيها نجح البرنامج وتواصل واستمر وأصبح الأول منذ بدايته…!!!
‘بحّاث’ محترف
مثلا سجلنا مع سي عبد المجيد البلومي ساعتين غير درجين وعدينا منهم ساعة و درج…ولو خليناه يتوسع يقعد يحكي ثلاثة سوايع دون تقيد بفكرة الحلقة وموضوعها…وبعض الإجابات طلبنا منو يعاودها موش لأنها خايبة بل لأنها خارج موضوع الحلقة…وبعضها قصيناه…وقاطعتو بعض المرات لضبط الوقت والعودة للفكرة والبحث عن إجابة لسؤالي موش سؤال آخر…وما كانش ساهل التحاور مع ‘بحّاث’ محترف وعملاق وداهية خبرتو 34 سنة…ويستنطق في أخطر وأكبر المجرمين…بصراحة تعبني شوية ساعات بقدرتو على الافلات من السؤال…ولكن في الأخير خرّجنا منو أفضل نسخة وعطانا حوار ممتع ومثير ومشوق…وكان متمكن ومحترف ووحش…وتصريحاتو كسرت الدنيا…!!
يا تحبها يا تكرهها
البرنامج نجح كما هو…بتفاصيلو وأسلوبو وإستفزازاتو…روح البرنامج يا تحبها يا تكرهها كيما هي…حوار مرح ومشاكس وجريء…وانت حر تتفرج أو تبدل من غير تكسير راس…والاستمرار موش ساهل…لازم كل حلقة فكرة أخرى مختلفة وجديدة واقتلو يصبح حي…ولازمنا نحسنو ونطورو ونجددو…لكن بالنقد المقنع موش بالتعليقات التافهة…!!
شكرا على تفاعلكم الكبير مع حلقة جاتني فكرتها صدفة منذ أيام وأنا مسافر وبرمجتها في أيامات وفي وقت قصير…وما تصورتش أنها باش تحقق كل هذا النجاح…ويا ربي معانا في بقية الحلقات…لأن النسق لا يرحم…!!!
