كتب: سمير الوافي
كل ما نكتب على النهضة كلام ما يعجبهمش…يقولولي ويعاودولي بسذاجة وتصطيكة ” الغنوشي حضر في عرسك “…!!
اي حضر في عرسي موش كتب عليّ الصداق…حضر في عرسي مع أغلب الطبقة السياسية بمختلف إنتماءاتها…لأني كنت منشط برنامج سياسي معروف…ما تنجمش تشوف رياضيين والا فنانين فقط في عرسي…لأن السياسيين كانوا المحيط متاعي وشبكة علاقاتي المهنية والتواصل معاهم شبه يومي…حضر في عرسي مثل بقية السياسيين اللي فيهم شكون كان يصيح وقتها ‘يا غنوشي يا سفاح’…حضر في عرسي مجاملة كيما حضر لبرشة إعلاميين وسياسيين يختلف معاهم ما ذكرهم حد…واللي يحضر في عرسي هو ضيفي ومن واجبي نفرح بيه بأخلاق أبناء الريف…خارج السياسة…!!!
استضافتان فقط!
لكن مهنيا الغنوشي ما كانش يحب يجي لبرامجي…وآخر مرة إستضفتو عام 2014 في الحوار…وهي المرة الثانية بعد إستضافة أولى قبلها في حنبعل…يعني مرتين فقط طيلة مسيرتي…والنهضة علاقتي بيها توترت برشة بسبب محتوى برنامج ” وحش الشاشة ” في قناة التاسعة…اللي كان يستضيف معارضي النهضة وقاطعوه جماعة النهضة…وعملو صفحة ” أولاد 9 ” لتشويهنا بالتسريبات والإشاعات والتجريح والثلب اليومي…وكانت تابعة شبكة ” انستالينغو “…موش معناها كنت مناضل ضد النهضة…لا لا عمري ما كنت…لكن لا كنت مقرّب ولا محبوب عند الحركة في السنوات الأخيرة…وستاتياتي الحادّة حول مظاهرات النهضة في الكورونا مازالت موجودة…حيث طالبت بمحاكمة من عرضوا حياة الناس للخطر…ومع ذلك أنا آخر واحد يدعي معارضة النهضة…إحتراما للذين دفعوا أثمان باهضة بسبب ذلك…!!!
مانيش ناكر ولا حاشم
الغنوشي حضر في عرسي نعم…مع كل الأطراف السياسية المختلفة…ومانيش ناكر ولا حاشم ولا متحرج…لأني نفصل بين حياتي الشخصية وحياتي المهنية…واللي هناني في عرسي أو عزاني في وفاة والدي الله يرحمو…موش معنتها سكرلي فمي او شرى قلمي او سيطر علي…وأغلب الطبقة الإعلامية و السياسية اللي موجودة لليوم…كانت على علاقة بالغنوشي والنهضة أكثر مني مليون مرة…وفمة شكون إستفاد بالفلوس أو المناصب أو المكاسب…!!!
صايي تحرقت لوبانة ” الغنوشي حضر في عرسك “…جيبو غيرها !!!
