كتب: رياض جغام
فعلا البيان اللّطيف النّاعم و الرّقيق الذي اصدره النّجم بخصوص ملفّ كوليبالي لا يرتقي إلى مستوى الفعل الشنيع و الجريمة التي ارتكبت في حقّ الفريق…و ألخّص لكم الموضوع في هذه السّطور و احكموا بأنفسكم…
بداية الحكاية
ماي 2019 النّجم ينتدب كوليبالي الهارب من الأهلي المصري من 2017 و الصّادر في شأنه قرار إيقاف عن اللّعب و دفع 4.2 مليارا للأهلي المصري و هو لاعب مصاب جاء للنّجم من المطار إلى كلينيك اليسر مباشرة…يعني من قلّة الخصّ في باجة ليتوال تتورّط في 4.2 مليارا هكّة لا طاح و لا دزّوه…
أوت 2021 الفيفا توقف كوليبالي عن اللّعب 6 أشهر و تمنع النّجم من الإنتداب 3 فترات …يعني النّجم كان قاعد قام يعنّق في الحيوط…و يا حيط إيجا طيح عليّ…
الى 5 مليارات!
جانفي 2022 ديون الأهلي عند النّجم و كوليبالي ترتفع إلى 5.7 مليارا بالفوائض و الخطايا …يعني بيكش و إلاّ نزيد عليك…و النّجم يتورّط مرّة أخرى في اتفاق و تعهّد بدفع المبلغ للأهلي على 4 اقساط لرفع عقوبة المنع عن النّجم و الإيقاف عن كوليبالي…
مارس 2022 أي بعد أقلّ من شهرين كيف يجازي كوليبالي ليتوال التي أنقذت مسيرته و ورّطها في 5.7 مليارا؟…يفسخ عقدم من جانب واحد و يقاضيها من أجل 90 مليون قيمة 3 جرايات غير خالصة و يطلب غرامة مليار و نصف تقريبا من الفوق …فمّاش واحد تمنيك و تمسخر و تهكّم و ضحك على ليتوال قدّ هذا ؟…بصحّتو و بصحّة المسؤولين في ليتوال اللي خلاّوه يعمل هكّة…
اي نعم يا سيدي…
كوليبالي الذي تكلّف على ليتوال 5.7 مليارا تحوّل للّعب في قبرص بعقد قيمته موسما كاملا 54 مليون…إي نعم يا سيدي…يلعب عام كامل بحقّ أقلّ من زوز شهريات في ليتوال…
28 نوفمبر 2023 الفيفا تلزم ليتوال باش تدفع لكوليبالي 780 مليونا زايدين على 5.7 مليارات اللي دفعتهم للأهلي المصري..
ببان ناعم لطيف….
أنا قلت سأترجم البيان التوضيحي للنّجم لأنّه بلغته التي حرّر بها بيان لا يفهم و لا يوضّح و لا يفسّر …من المفروض أن يكون البيان أكثر شراسة و أكثر عنفا و أكثر قسوة و أكثر قبحا مع الذين تآمروا على ليتوال …بيانكم ناعم لطيف رقيق لا يفسّر الغبن و القهر و الوجيعة التي تسكن أعماقنا…التّمنييك موش باهي …و اللّي يعمل الشرّ و ينويه حسيبو ربّي…
